balmaxaa diyaanada gabadh yahay ku daba dhigay

Gabaygan waa gabay  ka hadlaya diyaanada oo tiriyey hal abuursomalied gabaygan oo lamagac baxay balmaxaa diyaanada gabadh yahay ku daba dhigay ayaa waxa hal abuurku waxa uu kaga hadlayaa dhibaatada diyaanada isagoo tusale usoo qaadanaya gabadh ay waa is aqoon jireen isla markaana waqti ka dib isticmaashay daawadan waxa kale o uu uga digayaa dhalinta somalied inay iska ilaashaan daawadan hablha isticmaalaa inaanay ku dagin casaan beena ee uu yahaycudur ay hulaaban yihiin hadaba bal aan isaga kiin baxo idinka iyo hal abuurka

Farmashiye daawada Dadku uu ka iib sadoo

Aartiste door ihi Al-Islam ku daabacay

Dorraad mar aan dhexjoogaa Gabar qurux daraadeed

Daymada wejiga hore Daa’uus la moodaa

Dalaq iigu soo tiri

Salaan debecsan dabaded Dawadaas ma haysaa

Ayay tiri dukaankiyo Ninka daaska gadayow

Dubkeeday cawarayoo daymada jalleecada

Waxaba kulama daahine Durbadiiba waxan iri

Haddii aan ditoor qorin Qof kastoo dalbanayaba

Degdeg ugama iibshoo Lacag daalib maahiye

Doonisteeda garataye waxa ay dawaysiyo

Difeetada ay leedahay Ma taqaan dawadatani

Ditoor anigu maahiyo Waxa ay dawaysiyo

Difeetada ay leedahay Dani igama haysoo

Haddaad adigu diiddana Duul iga gadaayoo

Doonaaya lacagtaan Daafaha magaalada

Degdeg uga helaayaa Ayay ugu danbayntii

Jawaab diirran igu tiri

Dibna kalafurkeedii Ilkeheeda dabarka leh

Inaan deris ahayn beri Intii aan dareemaan

Dabadeed waxaan iri Dadkaas kaa gadaayaa

Iyagiyo dantoodee Yaynaan taas ku daahine

Horta sow dalaystii Ina Daahir maahayn?

Dabcan haah ayay tiri Iyaduna docdayday

Kaftan diirsimaad loo Waxay debecsan igu tiri

Dadka waysu badinaye Miyaa lays dafirayaa?

Daqiiqada yar gudohood Dib inta u fekerey-baan

Dabaded waxan iri Dalays waa runtaayoo

Ilaa dalandalkaagii Dadka waysu badinoo

Diraacdii dhoweydee Duunyadu baxaysana

Dhiirran dacalladeedi Waataan ka derisnaye

Dubkaan kugu aqiin iyo Hadmuu diirki kaa kacay?

Intay dib u dhaqaaqdoo Hadba doc iga eegtay

Durbadiiba waxay tiri Caku waa danbaysaa

Beledkaad dorraad timi Sowtii dad-hore-yiri

Doqon iyo habeen baa Madow loogu dawgalay

Dubkaan aan caddaystana Daliilkiisi waa kaas!!!!!

Dahabiga afkayga ah Intii aan dibnaha furay

Ayaan deeto waxan iri Gabaryahay diyaaniyo

Daawooyin lagu daray iyo durunafaa baad

Dushaadii marmarisoo Dubka sare caddaysoo

Dayax soo baxaayiyo Cadceed dacalka dhigatiyo

Waagoo dillaaciyo Daliig qaanso roobaad

Dushaadii la moodyoo Dalaystaan aqiin iyo

Ina daahir maahide Balmaxaa diyaanada

Gabaryahay-ku-dabadhigay?

Caku loonka doorsama Dubkaagi madobaa

Deeq laysa siiyiyo Deyn lays amaahshiyo

Diinaarka carabtiyo Doollar laguma helayee

Alla dahabsanaayaa!!!! Iblays baase kugu diray

Oo doori kugu yiri Raggaa kaaga didayee

Dabcigiyo wanaaggii Daayin kuu sameeyiyo

Dubkii uu Ilaahay kuu doortay adigaba

Haddaad diiddey oo tiri Mid kaloo ka doorroon

Ayaan doonanaayaa Diintaadan baranoo

Waa kuu damiin-nimo

Haddaad calafka doontoo Xoog ku daalibaysiyo

Dubkoo layska qaadana Horaa loo diyaarshoo

Dadaal laguma gaaree Waa kuu damiir xumo

Caku ways dullaysaye Adigiyo duqaagii

Arooskiinna dabaded Dadku idinka kala tegey

Deriskiyo xigaalkuna Laguu daayey hawshii

Dabka yaa bal kuu shidi?

Waxa kaaga sii daran Daafaha magaalada

Dan haddaad ka leedahay Qorraxduna dab ay tahay

Duqu gaari malahoo Danyar reerku weeye

Ayaa duhurki kuu socon?

Waxaa kaaga sii daran Haddaad ruux`dagaashaan

Dakharkii ku gaaraa Dedgdeg uma bogsanayee

Xaggeed daawo uga heli?

Waxaa kaaga sii daran Wejigii dawaeysoo

Majihii ka deysaaye Dubkaagoo ah kalakaan

Qaybina daruur tahay Inta kalena dugul tahay

Dadku inay arkaayaan Ma dafiri karaysaa?

Waxa kaaga sii daran Dubka dhabanku weligii

Dayax soo baxaayiyo Daruur haw ekaadee

Dibnahaaga madwgii Waakaa ku daahane

Dadku yuu la yaabine Maxaan kaga daboolnaa?

Waxa kaaga sii daran Dedgdeg midu u geeyoo

Isaguna difeetada Dib ka qoomameeyiyo

Damanaha ma sheegine Haddii aan dadnimadiyo

Dabcigiyo aqoontiyo Loo bogin duntaadii

Dubka walalacdiisaas Raggu dooni maayoo

Horaa looga soo digey Anna waa ku sii daray

Waxa kaaga sii daran Docda reerka xididka ah

Iyadoo laguu diray Oo halkay degaanniin

Aan durunafaa iyo Daawooyin lagahelin

Diyaanadi ad sidatana Kaa dabargo’ ay tahay

Dadka waxad dhexjoogtoo Waa dahab la mooddi

Danabkeennu guursdey Duqdu ay tiraahdaba

Toddobaadyo dabadood Dubkaagii wacnaa iyo

Inay daamakaagii U ekaa daruuruhu

Dogoba yeelanaayaan Deriskuna dhehaayaan

Furuqi la dabarjaray Miyaa dunida soo galay

Daawaan is mariyana Dibnaha aadan marin Karin

Maygu diiddan tahay taas?

Waxaa kaaga sii daran Midabkoo la doorshaa

Diinta kuma bannaanee Haddii adan danbowdaye

Degdeg toobad soo celin Inuu daayin Eebbuhu

Kaa daayo mooyee Naftu waa dabayloo

Mar ay duuli ma ogine dabka naarta aakhiro

Maw dulqaadanaysaa?

Illeyn dhagax dixeed iyo Nin dundumo u qayshadey

Isagays-ka daalaye Dalays wanadaydii

Qalbigeeda kuma duxin Anna waan ka dabaharay

Illeyn diiddey taladee In aan kula dagaalona

Qori mayso diintuye

Dadweynow dhammaantiin Intaasoo difeeta ah

Iyo qaar kasii daran haddii ay dubkoodii

Dawadani u leedahay Oo dumarka qaarki

Iyo wiilal diinyari Shaydaan u duufsaday

Dusha inay marmariyaan Weli door bidaayaan

Bal maxaa diyaanada iyo durinafaadiyo

Daawooyin jaankaan Dusha lagu caddeeyaba

Ubadkeenna dabadhigay?

Waynaan dareemine Xayaysiin daraadeed

Miyay dollar lacageed Dalalkii sameeyiyo

Dibadaha ka qaataan?

Culumaa-u’-diinkiyo Dadka waalidkaa iyo

Duqowdiyo wax`garadkiyo Aqoonyahan digriiliyo

Abwaannadii dalkaygiyo Qof kastoo damiirlow

Sidii gabar la doonoo Xidid-keed u dadab galay

Haddii wiilki dibad jirey Dhegihii dalooshaday

Timihiina loo dabay Dalka gabadhi joogtana

Daawooyin marisoo Dubkeedii beddelan yahay

Darxumiyo iyo ceeb iyo Dhaqan dooris weeyee

Dibadda iyo gudahaba Ubadkeennan doorsamay

Mayska daawanaynaa?

Diyaanadiyo Riikada Iyo Durunafaadiyo

Daawooyin kale oo Dubka lagu beddelayaba

Ganacsade dabbaalaa Dibadaha ka keenee

Markii dawlad loo helo Halla dabagalaan iri

Dareenkayga saan qabo Haddii dunida oo idil

Laga waayo dumar kale Gabar durunaafaa iyo

Daawooyin marisoo Dubka sare caddaysoo

Inta dibadda loo diray Berked dalaq ku soo tiri

Ragow yaanay idin dagin.

W/Q:- Abdirisaq Abdirihman Ahmed

Under the International copyright laws, no one should copy this story without the permission of the author and 4somaliwomen.com. This execlusive story belongs to 4somaliwomen.com.